പൊതുമധ്യത്തില് അപമാനിച്ചെന്ന് സാന്ദ്ര തോമസ്; ബി ഉണ്ണികൃഷ്ണനെതിരെ കേസ്
കൊച്ചി : പൊതുമധ്യത്തില് അപമാനിച്ചുവെന്ന നിര്മ്മാതാവും നടിയുമായ സാന്ദ്ര തോമസിന്റെ പരാതിയില് കോടതി നിര്ദേശ പ്രകാരം സംവിധായകന് ബി ഉണ്ണികൃഷ്ണനെതിരെ എറണാകുളം സെന്ട്രല് പൊലീ പൊലീസ് കേസെടുത്തു. ഹേമ കമ്മറ്റിക്ക് മുന്നില് മൊഴി നല്കിയതിന്റെ പേരില് ബി ഉണ്ണികൃഷ്ണന് വൈരാഗ്യ നടപടിയെടുത്തുവെന്നും സിനിമയില് നിന്ന് തന്നെ മാറ്റി നിര്ത്തിയെന്നും സാന്ദ്രയുടെ പരാതിയിലുണ്ട്. ബി ഉണ്ണികൃഷ്ണന് തൊഴില് മേഖലയില് നിന്നും തന്നെ മാറ്റി നിര്ത്തി. സാന്ദ്രാ തോമസിനോട് സഹകരിക്കരുതെന്ന് മറ്റുളളവരോട് ആവശ്യപ്പെട്ടു, തൊഴില് സ്വാതന്ത്രത്തിന് തടസം നിന്നു തുടങ്ങിയ കാര്യങ്ങളും പരാതിയിലുണ്ട്.നിര്മാതാവ് ആന്റോ ജോസഫാണ് കേസില് രണ്ടാം പ്രതി.
ഹേമ കമ്മിറ്റി റിപ്പോര്ട്ടിന് പിന്നാലെ, നിര്മാതാക്കളുടെ സംഘടനയെ സാന്ദ്ര രൂക്ഷമായി വിമര്ശിച്ചിരുന്നു. സിനിമയുടെ തര്ക്ക പരിഹാരവുമായി ബന്ധപ്പെട്ട യോഗത്തില് ലൈംഗികാധിക്ഷേപം നേരിട്ടെന്ന സാന്ദ്രയുടെ പരാതിയില് പ്രൊഡ്യൂസേഴ്സ് അസോസിയേഷന് ഭാരവാഹികള്ക്കെതിരെ പൊലീസ് നേരത്തെ കേസെടുത്തിരുന്നു. പിന്നാലെ സംഘടനയ്ക്ക് കളങ്കം ഉണ്ടാക്കിയെന്ന് ചൂണ്ടിക്കാട്ടി ചലച്ചിത്ര നിര്മാതാക്കളുടെ സംഘടനയില് നിന്ന് സാന്ദ്രയെ പുറത്താക്കി. എന്നാല് ഇതിനെതിരെ സാന്ദ്ര തോമസ് കോടതിയെ സമീപിക്കുകയും, പുറത്താക്കിയ നടപടി കോടതി സ്റ്റേ ചെയ്യുകയുമായിരുന്നു.
